خبز وعنب

لا يا عمك… مش الفقر السبب، أنا بعرف ناس حالتهم المادية كانت ممتازة وقادرين كل يوم يوكلوا لحم، لكن ممكن تشوفهم بوكلوا أكلات بسيطة جدا ومبسوطين ومكيفين… الناس كانت عالبركة وعالبساطة ومتواضعين ما عندهم نفخة ولا شوفة حال وما في أنا برستيجي عالي وانا وضعي ما بسمح، ولازم نحافظ عالاتيكيت، ما في شي من هالسوالف ومن هالخرابيط كلها، عادي ممكن حتى المرتاح ماديا يكون غداه بطيخ وجبنة بيضا… بطيخ هذيك الايام ما بنزل عالسوق غير في الصيف بطيخ جنين الممتاز صح اكبر بطيخة كانت قد كرة القدم لكن زي العسل وما كان في غش ولا جشع وما كان في لا هرومونات ولا كيماوي، نشقح البطيخة سيور ونحطها فوق الزير حتى تبرد ما في لا ثلاحات ولا برادات، اقولك كنا نترك الطبخ ونوكل بطيخ وجبنة، اما اكلة الخبز والعنب فهذي الأكله مشهورة أكثر شي عند العمال بتشوف عمال الأشغال العامة والورش في الصيف فطورهم أكثر شي خبز وعنب… أنا نفسي جربته كثير، زاكي وممتاز وألف نعمة وألف الحمد لله، صحيح يا عمك كان في فقر أنا ما بقول لأ، وكان في ضيقة حال هذيك الأيام على معظم الناس، ويمكن في ناس كان كل أكلها بس خبز وشاي… لكن صدقني لما تشوفهم بتقول هذول أسعد الناس… بنكتووا وبضحكوا ومبسوطين، البال مرتاح والمزاج عال العال…
يا عمك ما في أبرك من البساطة وما في أحسن من التواضع…