عنب وتين

الحين وزمان وفي كل حين غاطسين لشوشتنا (لقمة روسنا) في النعم والخيرات والحمد لله غطس، نعم وخيرات من كل الأشكال والألوان… روح أي سوق أو ادخل أي مول مثلا وشوف… لكن أيام زمان مع ضيق الحال عند أغلب الناس ومع إنه لا مولات ولا رفاهية ولا غيره… لكنها كانت غير… حلاوة أيام زمان غير وألف غير… لا زحمة لا هم لا تفكير لا تعقيد لا حسد لا كراهية ولا تعب بال… أقولك حتى الإنتخابات اللي فرقت الناس وفتتهم هالأيام كانت زمان غير، يمكن كانت تجمّعهم… ولو سألتتي ليش؟ بقولك لأنه ما كان في أنانية ولا في أحقاد… كانوا أكبر بكثير من كل هالامور…
خلينا في العنب أحسن… من العنب مثلا الحين موجود خمسين نوع ونوع، اشي زيني واشي أخضر واشي احمر واشي اسود… اشي ببزر واشي عنب بدون بزر… لكن صدقوني عنب زمان أزكى منهم كلهم… وتين زمان ازكى… وقعدات زمان أزكى وأحلى وأبرك… وكل شي زمان أحلا وأبرك… القصة يا اخوان مش قصة عنب وتين… لا… القصة أكبر من هيك بكثير… قصة ناس كانوا عُقّال، كان عندهم حكمة وفاهمين الحياة أحسن منا… قصة المحبة والاحترام اللي بينهم وقصة قلوبهم اللي على بعض، قصة مخافة الله وقصة ضمير حي وقصة دين ببين من اول يوم على السلوك…
بعد العصر في القيظ لما حوش بيت الطين تكون أرضيته الشميمتو (الأسمنت) مشطوفة ومبردة وبتلمع من النظافة… بتصدقوا؟… حتى النظافة هذيك الأيام كان إلها ريحة حلوة… ولما الهوايات (النسمات) تجيك وانت في الحوش من كل جهة، وتنفرش الجنايات الفرشات والمراكي تحت معرش الدوالي وحواليك تنك الزريعة على داير الحوش وقواوير الورد وريحة الياسمين والفل والقرنفل بتفحفح، يا سلاااام!!… اما منظر الورد والمنثور والنرجس حواليك ف إشي بفتح النفس… وأهم شي ان البال من رب العالمين رايق ومرتاح… يا ربي لك الحمد والشكر… في نص القعدة صينية عليها ابريق الشاي الأزرق اللي بتخبروه… ابو ثلاث كاسات سكر، ويمكن على الصينية أكثر من عشرين كاسة جرس(نوع كاسات مضلّع) كاسه منها فيها نعنع ومصبوب فيها شاي ومقلوب فوقها كاسه ثانية حتى ينقع النعنع ويطعّم مزبوط، بعد ما يخدر شاي العود في الابريق وينحط عليه النعنع اللي قطعوه الأولاد الحين من الحوض تعال يا حبيبي واشرب، واحلى شي لما تتجمع العيلة كلها كبارها وزغارها في قعدة الحوش… وضحكهم واصل لآخر الشارع… فوق زير المي قدامك هناك سدر علية بطيخة مشقحة سيور سيور، حمرا مثل الدم… وعلى السدر الثاني اللي حاملينه الأولاد قطوف العنب… قطعوها من على الدالية وما ظل على الدالية غير القطوف المكيّسات كل قطف في كيس… هذول القطوف المكيسات ممنوع ناس يقطع منها هذول للضيوف الغُرب… وعلى السدر مع العنب كوم تين اشي سماري واشي خضاري… الحماطات(شجرات التين) في الخرابة تينها بشهي وزي العسل، تين وعنب بذكرك في بياراتنا وفي بساتينا وفي طيبة أهلنا… بذكرك في بساتين وادي موسى والرحلات عند المخاول والطنايب أو في بساتين ايل وبسطة والبير عند النعيمات النسايب… وبذكرك في كل خيرات بلادنا وكرم أهلنا من شمالها لجنوبها… اخوانا واصحابنا في مروج وضواحي عمان، ومن حفاير العقبة عالشط للسلط للمفرق ولجرش ولعجلون إلى اربد عروس الشمال وقراها… وبذكرك في خيرات بلادنا وأهلنا في فلسطين وفي جنات فلسطين… أنعم وأكرم بالجميع…
زمان كان الخير وكانت البركة وكانت البساطة وكانت المحبة وكانت راحة البال… ولو في ربابة كان اخوكم عبد الله حامد الحين جر عليها وقال…
الله على أيام راحت خوالي
وشيوخنا نجوم في السما تلالي
الله على حارتنا يوم البيت واحد
والبلد فزعتها على قلب واحد
الله يوم طيبهم والنخوة علامه
والكرم والجود كله والشهامة
الله على أيام العز والمعالي
الله على كل هذيك الليالي