مدونة عبد الله كريشانبحث

مع هالمنخفض بدنا عوامي

عبد الله حامد كريشان
رسم تعبيري لخاطرة «مع هالمنخفض بدنا عوامي»

مرات بتنزله من فوق الطاوله عالارض، اريحلها، تربعت، وهي بتدك في البابور قالت ولا واحد فيكو يعتب عتبة الباب ترى الدنيا برا موت احمر هوا وبرد بقص العظم قص، سميطة وزنيطة وحليتي كلهن مع بعض، يعني سكرو باب الغرفه واحشوا تحت الباب لحّاشية مشان البرد ما يوشِّت علينا من تحت، هي الصوبه هدرجت حطوا عليها ابريق القرفي، وانتي قومي هاتي المقلاية خليني اسويلهم العوامي من زمان وعدت اخوانكي فيها، دايما لما بتشتغل بتدندن وبتغني… بتروِّد رويد، كل شغل الو رويد شكل… رويدها عالغسيل غير رويدها وهي بتحمم العيال وغير رويدها وهي بتكتس البيت أو بتشطف… رويد حمام العيال معروف، طهرو يا شلبي وناولو عمو… ورويد الشغل مشكل وعلى حسب المزاج اشي غناوي راديو يا زريف الطول وقف لقلك وعالعين موليتين… واشي رويد تراثي، وحدوا ربكو يا سامعين… واحدن ما اعتلى فوقه حدا… ومرات غناوي السكي هرعي الماكينة طلت من الدبو يا رعدها… أو بسكليت ابو وردي… اما التعزيل فلازم اشي حماسي مثل هبت النار والبارود غنى… أو يهويدل ويدلك يهويدل ويدلي… بتنشط.

أطول رويد رويدها عالغسيل، بتجر على السحجي ساعتين، السحجه المعانية ازبط شي للغسيل من طولها والغسيل بطول، بتبلش من اول القول نمدح بذكر النبي يا شفاعة محمد وجيرة علي و يا هل الفرح ربي يبارك ليكو وكل زغير على الحول يدرج ليكو… وبتجر قد ما بدك لعند عيال يا عيال طل من الشرق صايح انتو مجانين ولا عقلكوا رايح… ولعند يا رايح الشام يا ملعون ابو جدك… البنت ع يدنا ماهي على يدك… لما تخلص وتبلش تنشر الغسيلات من فرحتها بتغني كثر الله خيركوا ويخلف عليكو وبتمط كلمة خيركوا من عند اليا مط ع قد ما تقدر… اذا كان جوها مو مزبوط ومتنكدي ما بتسمع منها غير

يا حسرتي عالطير قصوا جناحو

طيرن بلا جنحان ما يطير

(سامحوني أصدقائي من اللهجات والدول الأخرى على الغموض

)

العوامه ما إلها رويد ولا غناوي ولا شي والعيال لخموها وجننوها، مقربزين حواليها زي القرود كل ما بتحط حبه في الصحن بلطوها لط على طول… مسكينه صارلها ساعتين بتقلي والصحن تقول مخزوق، للحين ما فيه ولا حبي… قالت اخصو يا شينين مالكو منفجعين هيك استنوا شوي بس اخلص بنوكل مع بعض، الله اكبر، سمطتوهن كلهن قبل ما احطهن بالقطر، ابوكوا الحين بروح خليه يذوقلو حبي… اسم الله والرُحمن… شو هاظا؟! تقول سعادين…

الزغير بعرف شو اللي بخليها تتجلى وتنسى حالها، قال يمه… بااام… يمااا… بالله عليك تغني هلولي يا هلولي وانا راكب ذلولي واحنا بنرد وراكي… وعلى طول بلشت قالت هلولي… قالوا يا هلولي قالت وانا راكب… قالوا ذالولي. قالت صنولي… قالوا خنتمقل. قالت عالشب… قالوا اللي لاقاني… وسحبت عليها سحب… هي بتطلع بتغني… وبتقلي… وهم بردوا… وبسممطوا عوامي…

قراءة المنشور الأصلي على فيسبوك