مدونة عبد الله كريشانبحث

لا بخيل ولا شكاك

عبد الله حامد كريشان
رسم تعبيري لخاطرة «لا بخيل ولا شكاك»

طبعا هذي بنتي وقطعة من قلبي وبعرف انها كمان قطعة من قلبك واكثر انت أمها وحنية الأم أكثر، وبعرف قديش محبة اخوانها وخواتها الها… عشان هيك كل الناس بتتحرى وبتتروى في الزواج، واحنا كمان، ولازم نستعين بالله قبل كل شي وانا في كل صلاه بسال ربي انه يتمم على خير ويطمنا عليها ويوفقها ويرزقها ابن الحلال الزوج الصالح اللي يصونها ويحافظ عليها ويقدرها ويعزها ويكرمها ويسعدها ويريح بالنا من جهتها… اليوم الوضع صار بخوف، وللاسف كثير من الشباب طايشين، وما بتحملوا المسؤولية، وكل يوم بنسمع قصص اشكال والوان عن المشاكل… يعني اذا الاب والاهل كانوا زمان يسألوا عن عريس بنتهم مرة الحين لازم يسألوا عنه الف مره…

أكيد في ناس محترمين والدنيا بعدها بخير واكيد في شباب بخافوا ربهم وبقدروا المسؤولية وبحافظوا على الامانة اللي صارت في رقابهم، الزوجة أمانة في رقبة زوجها طبعا، والطيبين الحمد لله موجودين وان شاء الله بنتنا تكون من الطيبات ويكون عريسها من الطيبين الأتقياء الأنقياء… أنا بدي اطمنك يا ام العروس اني سألت عن الشب كثير… الشب الحمد لله بصلي وبعرف ربه، وسمعته ممتازة، رؤساؤه وزملاؤه في الشغل كلهم شكروا فيه وحمدوه قالوا انسان راقي ورايق ومش عصبي ولا انفعالي وملتزم ومخلص في عمله ومش تبع مشاكل بالمره، وبتعامل مع البنات والستات ومع الجميع بكل أدب واحترام، اهله كمان ناس محترمين، أصلهم طيب، وسمعتهم طيبة، جيرانهم وكل اللي بعرفوهم قالوا عنهم انهم من احسن الناس وانهم في حالهم… والشب كمان مثل بنتنا متعلم وجامعي ومستقر في عمله الحمد لله…

أنا شايف من وجهك ومن عيونك وعارف شو بدك تقولي، بدك تقولي اهم شي عندي بعد الدين والاخلاق انه ما يكون بخيل ولا شكاك… اطمني… باذن الله الشب لا بخيل ولا شكاك… وربنا يتمم على خير… االلهم بارك لهما وبارك عليهما

والف الف مبارك للجميع

قراءة المنشور الأصلي على فيسبوك