صوبة البواري

اسمع لا تجنن امك… دوشت راسي… عارفيتك شغل كلام كثير وفلسفه، قوم بلا صوبات غاز بلا تطور بلا مكيفات بلا بطيخ، خلي التطور والمكيفات الكو… واحنا خلونا على قديمنا وقرنبعنا زي ما بتقولوا… النشرة الجوية بتقول جاينا منخفض من قبرص، واني عارفه منخفضات قبرص كيف بتقبرص ع روسنا وبتذبحنا من البرد ذبح، يله… قوم روح الحين جيب سلم الجيران واطلع عالسده رجع عليها صوبات الغاز تبعتكوا ونزل صوبة الديزل وبواربها والاتش وركبوها انت واخوانك، وما دخلك انت اذا انها بتهب ولا ما بتهب خليها تهب وتوسخ هو انت يعني اللي بتنظف، احنا اذا ما بنشوف بعيونا صوبة الديزل راكبة وبطيختها بتنقط ونارتها بتهدرج تهدرج ما بنحس في الدفا بالمرة… صوبة الديزل هذي عندنا مش بس دفا هذي دفا وعفا وتراث وتاريخ وذكريات، بكفي قعدتنا حواليها وابوك مكوع على جاعده ومركاه جنبها وبسخن وبقحمش الخبزات على الكوع، وبكفي منظر ابريق الشاي الأزرق فوقها وريحة القرفه… ولا ريحة الكستنا لما تشويها فوقها… يا عمي ما في زي صوبة الديزل خصوصا مع طنجرة العدس أو مع الرشوف أو مع الششبرك… ومع الراديو وصوت سلوى بتلعلع ولا توفيق النمري وهو بغني حُسنك يا زين جنني وخلالي عقلي طاير… يله يله ترى مسويتلكوا مفاجأة عالعشى أكلة من زمان ما اكلتوها…