مدونة عبد الله كريشانبحث

وين الفروة؟

عبد الله حامد كريشان
رسم تعبيري لخاطرة «وين الفروة؟»

من بين فرشات الصوف واللحفة المعزلات سحب الفروة، هو عارف وين بخبنها، لأن الخزانة ما بتوسعها آخر كل شتوية بصفطنها وبتنحط وسط المنام المعزّل فوق القاطع، هذا القاطع هو المخبى السري للحجة، كل شي بتخاف عليه الحجة بتخبيه جوا القاطع تحت المنام، القاطع زي الصندوق الكبير مسكر وعليه قفلين مو قفل واحد، القاطع غير صندوق البخور والند ولبس احرام الحج اللي فوق الخزانة، كمان الصندوق فيه أشكال وألوان، اما الذهب يا اخوان فمخباه غير، قلادة العصمليات والمباريم وباقي الذهب بتخبيه الححة في رجل التخت، تخت النحاس العالي، أكيد بتعرفوه، المهم لما سحب الفروة طلع معها صابونة لوكس الصابون المعطر اللي زمان (صابون امّسك) وقعت الصابونه عالأرض، ما استغرب، لأنه كثير بلاقي صابون زي هيك، اشي بين الملابس في الدروج واشي في الخزانة واشي بين الحرامات… قال ليش؟ مشان تظل ريحة الملابس والحرامات مليحة… ماشي… أهم شي الفروة تمام وريحتها تمام، وأخبار المنخفض تمام، الكل فرحان والحمد لله أخبار المطر بتفرح الجميع، المطر نعمة ورحمة، تمتم يا رب اسقينا الغيث ولا تجعلنا من القانطين يا رب تغسل وتطهر قلوبنا مثل ما بغسل المطر هوانا ودروبنا. صح شتا معان موت وقاسي وصح كل ما قال الراديو كلمة قبرص معناتو البردات مرتبات ومن الآخر، يعني برد وهوا ومطر وحليتي وسميطة وزنيطة، كلهن مع بعض بس عادي ومو مشكله، المهم يجي مطر وينعش البلاد ويغيث العباد،، بعدين لويش بدنا نخاف من البرد؟ الفروة موجودة، ترى هذي الفروة أصلية جايبها الحج من الشام من جوا صوف ومن برا جوخ، والجعدان مفروشات فوق الجنابيات (الفرشات) وفوق المراكي، وخُدرة الصوف اللي اشتغلتها الحجة على إيدها في المغزل مع بساط الصوف المخطط مفروشات فوق بعض، وصوبة البواري أم بطيخة جاهزة والبيت أصلن طين يعني دافي لحاله والمخزن الحمد لله فيه ثلاث أربع جركنات ديزل غير الحطب والفحم اللي في الخرابة والخرابة مليانه من خيرات ربك هوش وبوش وغنم وجاج يعني الحليب والبيض والسمن واللبن وجاد،… بالعكس يا اخوان أنا بنبسط وبكيف على منخفضات قبرص، قولوا ليش؟ لأنه بيجينا معها شغلات بنحبها وبنشتهيها ومشتاقينلها كثير، غير نعمة المطر منخفضات قبرص فيها لماتنا وقعداتنا وسواليف كانون… فيها ششبرك واكبيبات، فيها رقاقة ورشوف… فيها أقراص ولزاقيات وخبز طابون وشراك. فيها فطيرة سكر وشعرية مع سكر فيها نعايم الله… بعدين وانت مكوع جنب الصعوبة فوق الجاعد والفروة على كتافك لو المنخفض جايك مش بس من قبرص لو جايك من القطب ومن الاسكيمو ما بتحس فيه خصوصا اذا طاسة (قيشنية) شوربة العدس قدامك بتهبّي تهبي والخبزات مقحمشات على كوع الصوبه… يا سلااام… واذا فحفحت حواليك ريحة المجدرة ولا حشوة الششبرك… الله الله… استند هالمره وعدل عقاله ومجلد الفرد وقال يا ولد قوم علي الراديو عالاخر وبلش يهيجن مع عبده موسى يا هلا ويا مرحبا منين الركب من وين… اقبل علينا الضحى يا زينة اقباله

قراءة المنشور الأصلي على فيسبوك