مدونة عبد الله كريشانبحث

شمست شميسي

عبد الله حامد كريشان
رسم تعبيري لخاطرة «شمست شميسي»

صحيح احنا الحين في شباط لكن الدنيا اليوم بتشمس شوي وبتغيم شوي، والشمس مطلوبة، وانا كل ما قعدت في الشمس بعد منخفض تذكرت أيام زمان، وتذكرت شمست شميسي وكيف كانت الحارة كلها بعد المنخفضآت تطلع تتشمس، الحريم طبعا في حوش البيت أو في الخرابة… والباقين بنشروا قدام بيوتهم بيوت الطين وفي الساحات… البلد كلها كانت ساحات…، ما كان في عمارات ولا سيارات، ولا زحمة ولا اسكانات… ما كان في شقق صناديق ومكيفات بتطلعلك هوا ساخن لكن وانت محبوس بين أربع حيطان،… ما كان في للأولاد شاشات وبليي ستيشن وما كان في تابات… كانت البلد كلها ملعب للاولاد، حارات بسيطة وساحات مفتوحة ووين ما لعبنا في البلد أمان، بيوت الطين حتى من جوا مشمسه لانها مكشوفة للسما، أما الجمعات برا أحلى، عند كل بيت مصطبه وهناك عند راس كل شارع بتلاقي دكان، بركة زمان، قلوب طيبة كلها خير وحنان، هذا بيتنا وهذا بيت جدي وبيت عمي وابن عمي وخالي وهناك بيت عمتي وبيت خالتي، كلها بيوت قرايب وفي وسطهم ناس اغراب لكنهم مثل القرايب جيران الرضى والكل أصحاب وحبايب. هذي الخالة كل ما تشوفني بتناديني وبتقول تعال وين مكتومتك وين جيبتك؟ وبتعبي جيبتي قضامة وحلو ومبلس وبتقول روح يا بنيي ربنا يحميك ويوفقك، سلم على أبوك وسلم على أمك… والخالة الثانية بتقول خذ هالكعكات إلك ولاخوانك كعك معان مبارح خبزهتهن، زاكيات… واذا الدنيا رمضان بتشوف صحون الأكل (الفضيلة) مع الأولاد قبل المغرب بالعشرات، كل جار ببعث لجاره من أكلته وفطرته… مساكبة زي ما بسموها اخوانا في فلسطين. إذا خالة من الخالات طلبت منك تجيبلها شغلة من بيتكوا أو من الدكان لازم تكريك… يعني تعطيك كروة قرش ولا تعريفه ولا غيره… بيوت الحارة كلها فاتحة على بعض وفاتحة لبعض، كنا نمر من البيوت زي ما نمر من غرف بيتنا… الكل قلب واحد… جدي وجدتي عند باب بيتهم مصطبة بيقعدوا مرات عليها يشربوا شاي، ويتفرحوا على الرايح والجاي… منورين الحارة كلها، بس تشوفهم قلبك من جوا برتاح، كل اللي بمروا من الحارة بسلموا عليهم وببوسوا رأسهم… ادعولنا يا جدي ويا جدتي الحارة من غيركم ما بتسوى شي… ألعابنا اسألوا عنها الساحات… هذا اذا ظل في ساحات… الكبار شايفينا براقبوا من بعيد ومتطمنين علينا ومبسوطين واحنا كمان مبسوطين لانهم بسولفوا وبنكتوا وبضحكوا ومبسوطين، العابنا سولفت عنها قبل هيك كثير، كنا نلعب قلول، روس، وكمستير وطمية وسبع حجار… لعبنا مزقر وبلابل وحاب وطاب ودحله وكرة وكنا نتسابق وكنا نغني واحنا بنلعب… حتى للشمس غنينا

شمست شميسي على بيت عيشي… عيشي في المغاره، تحلب حليب الفارة… وإذا لعبنا جمّال يا جمّال غنينا

جمال ابن جمال سرقولك اجمالك… سيفي تحت راسي ما بسمع كلامك… وإذا قعدنا عالارض دويره… لعلع صوتنا مع بعض طاق طاق طاقية رن رن يا جرس حول واركب عالفرس… وإذا بدنا نتخوث على بعض ونضحك غنينا سكاكين بكاكين يقطع رجلين الواقفين… وسكاكين بكاكين يقطع ايدين القاعدين… يعني تمارين… لما نتعب وما بدنا نتكلم… قلنا طاقية الشيخ مليانه(…) واللي بتكلم بوكلها… ههههه بلاش اقول الكلمة ما بدي تقلب منافسكم

… طولت سامحوني…

يا اخوان صحيح الشمس في الشتا مطلوبة وبتدفي، لكن شمسنا زمان صدقوني دفاها كان غير وحارتنا زمان احوالها وناسها كانوا غير، والعابنا كمان كانت غير… كل شي زمان كان غير…

قراءة المنشور الأصلي على فيسبوك