شمسات كانون

بعد البرد والصقعه في الأيام اللي راحت وبعد الشرقية اليوم شمست عالآخر، وشمساتها غير شكل، شمس كانون مرغوبة الكل بحبها، لما كانت زمان تشمس في كانون زي هيك ما كان يظل في البيوت ولا واحد الكل بطلع برا بنشر يتشمس، ما بتشوف ولا مصطبة من مصاطب الحارة ولا قرنه من قرنها إلا وفيها ناس، كل مصطبة عليها كم واحد من زلام الحاره بسولفوا وبضحكوا وقدامهم ابريق الشاي الأزرق الكبير أبو ثلاث كاسات سكر، بعضهم في ايده علبة دخان الهيشي ودفتر الاوتومان بلف وبعضهم بلف دخان اوقق، الشياب كمان كل اثنين ثلاثة مكوعين هناك في فراوهم مقابلين الشمس ومقابلين بعضهم بلعبوا سيجي أو طاب يا عود، العيال الزغار منتشرين في الساحات، الساحات هذيك الأيام أكثر بكثير من البيوت، كلهم مبسوطين وبلعبوا اللي بلعب مزقر واللي بلعب فطبول وبعضهم بلعب سبع حجار، البنات الزغيرات كمان منتشرات بعضهن بلعب شبرا قمرا شمس نجوم وبعضهن كمستير وبعضهن بلعبن طاق طاق طاقية… العاب ركض وحركه بتدفيهم أكثر وأكثر… النسوان كمان كل وحده في حوش بيتها، الحوش مكشوف للسما وكله شمس مو مثل شقق البين الصناديق، منه بتتشمس ومنه بتشتغل، بشمسن الفراش، الخدر والبسط ولحفة الصوف وبحضرن للغدا، والغدا في هيك جو تسعين بالميه ششبرك أو رقاقه أو عدس أو رشوف، بعض النسوان بكونن يشتغلن في خرابة البيت بتفقدن الغنمات والجاجات والبيضات، وبعضهن بتخبز على الطابون وبعضهن بتخبز على الصاج خبز شراك إذا كانت ناوية تحلي البيت يومها وتسوي فطيرة سكر، ويا عيني على فطيرة السكر، أكيد فتحت نفس اللي بعرفوها وقاموا يتلمظوا الحين، يا اخوان على ذكر الششبرك وخبز الصاج وفطيرة السكر هفت علي كل هذيك الروايح الطيبة، أحلى روايح عندي ويمكن عندكم، لا تقولي عطور فرنسية ولا تقولي ديور ولا شانيل، مين ما بحب ريحة حشوة الششبرك وأمه بتقلي فيها وبتحمرها على نار البابور؟ ومين ما بحب ريحة السمنه البلدية والبصل لما يكون الغدا مجللة أو رز حامض؟ ويا سلام على ريحة الحطب تحت الصاج ويا سلام على ريحة خبز القمح وهو طالع من الطابون، الطابون أبو رضاف،
روايح بتجنن ما في أحلى منها إلا ريحة أبوك وأمك وانت بتبوس على اديهم وعلى روسهم… وكمان يا اخوان يا محلاها ريحة الحبايب.