مدونة عبد الله كريشانبحث

رشوف

عبد الله حامد كريشان
رسم تعبيري لخاطرة «رشوف»

قالت الأم ناوليني يمه نكاشة البابور بتلاقيها في درج النملية… نكشت البابور… وحطت كمشتين قمح في المقلاية ومسكت الملعقة في الايد الثانية… وهي بتحرك في القمحات على نار البابور… قالت يمه لحد ما اخلص القلية شوفي الصوبة اذا بدها ديزل خلي اخوكي يعبيها… الجركن هيو عند باب الخرابة… وشغلوا الصوبة قبل ابوكو ما يروح وجهزوله فراشه عند كوع الصوبة… الجاعد والمخدتين… والمكتي… ابوكو بحب يسخن الخبزات على كوع الصوبة…

قال الولد وهو بصب الديزل في بطيخة الصوبة… يمه ما بدنا قلية بدنا شعرية وسكر… يا سويلنا بسيسة… قالت الام وهي بتطفي البابور وبتفرغ القلية في الصحن وبترش فوق القمحات شوية بطم… اااااخ منكو بس… جننتوني… انتو بس بتتشهونو… فسقانين… انت بدك شعرية… واخوك بدو فطيرة سكر… واختكو الكبيرة بدها بكره ششبرك…

.دخل الحج… سلم وقال وهو بشلح الفروه… تراني سمعت كل شي… أنا كمان بدي بكره رقاقة يا إما رشوف… خلينا نتدفى في هالبردات… يا ناس شو ماله التلفزيون… ليش هيك مغبش؟

قوم يا ولد ليش دملت راسك… لا تسويلي حالك نايم… قوم اطلع على السطح خلينا نزبطه… حركلي الشبكة يمين ويسار وانا بقولك اذا زبط… يلله… الحين بتيجي المصارعة الحرة…

يا حج بلاها المصارعة الحرة الليلة… قالت الام… الحين تخلي العيل يطلع على السطح في هالسميطة؟!! الدنيا موت احمر… لا تمرض العيل… الحين بشغلك الراديو… الليلة في برنامج مجلس الشعرا…

طلعت الام عالكرسي ومدت ايدها للرف وفتحت الراديو وحركت المفتاح… قال الحج ايوه… خلص… خلص خليه… هذي سميرة توفيق بتغني… وارتفع صوت سميرة توفيق

بسك تيجي حارتنا… يا عيوني

وتتلفت حاولينا… الله الله

عينك على جارتنا… يا عبوني

ولا عينك علينا دخيل الله

ع ح ك

قراءة المنشور الأصلي على فيسبوك