نقرشة

شو جايب معك يا حج؟! ما شاء الله محمل ومزمل!! اسكتي يا بركه… اجتنا رزقة اليوم ماهي عالبال ولا عالخاطر… الحمد لله… وتبضعت شوية اغراض للعيال وللسهرة… انت ناسيه ان اليوم آخر حلقة في مسلسل صح النوم… بدنا نشوف غوار اليوم شو يسوي في حسني البرزان… جبت وقية نقرشة وجبت وقية بوشار بتزبطيلنا اياهن وجبت ملبس حامض حلو وبيض حمام وقضامة فيصلية وملبن للعيال… وجبت نص رطل بردقان ونص رطل مندلينا للضيوف… وجبت وقية شاي عود ابو الولد… أنا بتوقع الجيران اليوم يجوا يتفرجوا… حطو جنبيات وكراسي زياده… والشاي بتسويه يا حجه في الابريق الكبير… واذا الكاسات ما بكفوا جيبوا من عند جيرانا… أنا طالع عالسطح ازبط شبكة التلفزيون… شوف يابا خليك عند التلفزيون لما تجي الصورة مليح بتقولي…
يا حج أنا خايفة انها مهي قصة صح النوم… أنا سمعت ان سميرة توفيق الليلة بدها تغني… وانت لما تشوف وجه سمورة ع قد الشاشة وبتتغمز… عيونك ببطلن يرمشن…!!
الله يقطع بلايشك يا حجي أنا تبع غناوي؟! بعدين الشعب الاردني كله بحب سميرة توفيق وقفت علي أنا… هاتي بس جاكيتي خليني ازبط التلفزيون ما بدنا نقضي السهرة طالعين نازلين عالسطح… والتلفزيون يظل يوشت ونقضي السهرة وشششششش