سفرطاس

الساعة اربعة… الدنيا عتمة… لكن لازم يطلع يستنى القلاب اذا مر القلاب وما لقاه بظل ماشي… وبنخصم عليه يوم كامل… هيك نظام المياومة… قبل ما ينام بحضر كل شي… الكيس والسفرطاس ورغفين الخبز… رغيف للفطور ورغيف للغدا… الفطور عالساعة عشرة… والغدا عالثنتين… صارله اسبوع كل يوم عالفطور بوكل عنب وجبنة بيضا مع رغيف خبز… وعالغدا بوكل اللي ربنا قسمه واللي في السفرطاس… مرات بلاقي طبقه فيها رز وفي الثانية شوربة… فاصوليا أو باميا… بطاطا وبندوره… مش مشكلة انه ما علبها لحمة… المهم انها زاكي… مع الجوع كل شي زاكي… والمهم انه بشبع… آخر الشهر لما بنزل الراتب بكون في طبقة ثالثة في السفرطاس… ممكن كستر أو مهلبية أو هريسة… وبكون في قطعة لحمة راس العصفور مع الشوربة… المشكلة انه ما بعرف يوكل لحاله… كل مره بنادي واحد من الورشة يوكل معاه… خاطركوا… سكر الباب… في الايد الثانية ماسك السفرطاس… وقف عالشارع… الحمد لله ان الدنيا صيف… لو انها شتا كان ذبحنا البرد… رئيس الورشة بس هو اللي بركب جنب السايق والعمال كلهم وهو معهم بركبوا في القلاب ورا… والهوى بهفهم هف… نعمه… في غيرنا بتمنى يشتغل… ناول السفرطاس لاقرب واحد وتعربش وركب… قعد على ارضية القلاب… واسند ظهره… بدهم نص ساعة حتى يوصلوا. لسا النجوم في السما… يعني في ناس كثير بصحوا من النوم بعد اربع ساعات… ضحك… خذ سفرطاسك… مالك مبسوط ع هالصبح… تذكرت واحد صاحبي كان يروح عالبيت الساعة 11 الصبح… ومن بعيد ينادي على امه… يمااااا حطي الغدا… تقوله ياشين يا متعتس… الاوادم عيال الناس بعدهم ما صحوا من النوم… وانت جاي بدك غدا الحين!!
وقف القلاب نزل… حط السفرطاس والجاكيت في الخيمة… استلم القفه والكريك ومع انفاس الفجر الاولى بدأ يعبي الحصمة في القفة ويفرشها هناك عالبنكيت…