مدونة عبد الله كريشانبحث

سروه

عبد الله حامد كريشان
رسم تعبيري لخاطرة «سروه»

قبل ما تطلع الشمس بكون صاحي… هذا وقت البركة… وقت طلب الرزق… جو معان الفجر حتى في الصيف بارد… كيف في الشتا!! مرات كثير مية الحنفية ما بتنزل بتكون متجمدة… ومرات كثير بتكون المية في حنفية الحوش… من الصقعة والحليتي… بكون مثل الخيط نازل منها للمغسلة ومتجمد… ومع ان بردها الحين بقص المسمار قص… لكن لازم يقوم ويطلع لشغله… عليه سروه… لازم الحين يشغل السيارة… سيارته مرسيدس راسين. ومحمل لتبوك… وهو رايح بودي بضاعة لتبوك ومن هناك في الرجعة بحمل سحاحير خضرة فاضية… بوكسات… الحمد لله الحمل اللي محمله اليوم مش ثقيل… لكن التغريز في بطن الغول لا بد منه… الطريق ترابية… رمل… وكل مره في بطن الغول لازم يغرز… هو وغيره… كل السواقين اللي بحملوا للسعودية بصير معهم هيك لكنهم متعودين… لما المعاون بكون رايح معاه بساعده… ومعهم طبعا احتياطات في السيارة… صاجات حديد… وعدة مخصوص للتغريز… بحفروا تحت العجلات وبحطوا الصاجات وبتمشي الامور… وربك بعين… المهم ينفذوا من بطن الغول… اما باقي الطريق فمقدور عليها…

طلع برا عند السياره… كان مغطي البوز من مبارح في بطانية من بطانيات الجيش… حتى ما تتجمد المي في الروديتر… شال البطانية… حط لوازم الطريق في ثلاجة السيارة… دايما عالطريق بطبخ… مرات كبسه… ومرات بسوي قرص نار.حط ابريق الشاي والسكر والنعنعات… حط كمان شوية معلبات… شغل السيارة… السيارة بدها اقل شي نص ساعة حتى تحمى… بكون هو شرب فنجان القهوه ومرات بوكل لقمة… مثل كل مره قالتله… مرته تروح وترجع بالسلامة يا رب… بس لا تنسى الاغراض وانت جاي… جيبلنا معك من تبوك كم باكيت تايد وكم علبة صلصل… ومعلبات مشكلة… بضاعة تبوك غير شكل.عند الباب قربت عليه كثير… ووشوشته… جيبلي أنا قنينة بروفسي… وعلبة بخوره… وباكيت ند من الاصلي…

قراءة المنشور الأصلي على فيسبوك