مدونة عبد الله كريشانبحث

افرشولي بدي أنام ع السطح

عبد الله حامد كريشان
رسم تعبيري لخاطرة «افرشولي بدي أنام ع السطح»

أكيد كثير منا أيام زمان نام عالسطح خصوصا في مثل هالليالي الحارة والشوب… وبقول في أيام زمان لان الوضع هذيك الأيام كان غير…

أيام لما كان بيتي وبيتك يا صاحبي أرضى ويمكن مساحته مع الحوش والخرابة دونم أو دونمين ويمكن أكثر وما فيش جنبك عمارة عالية تكشفك…… أيام لما كان بينك وبين أقرب جار يمكن خمسين متر أو أكثر… أيام لما ما كان أي مخلوق يقدر يكشف شو جوا بيتك لا من قريب ولا من بعيد، وأيام لما كان اللي يقعد في حوش بيته ما يشوفه غير الطير اللي في السما… وأيام… وأيام… وكل هذيك الأيام يا صاحبي ولت للاسف وراحت… راحت مع الستينات والسبعينات، راحت لما صارت العمارات مثل علب الكبريت راكبة فوق بعض… شقق مثل الصناديق مصفطة والعمارة ملزقة في اختها، راحت البيوت الحلوة، وراحت الأرض الخضرا، وراحت البيادر، وراحت المروج والخيرات… كلها راحت لما عمّت الاسكانات وطمّت… حتى عمان في الستينات والسبعينات كانت بيوتها بتجنن وغير شكل، كلها فلل وفي كل فيلا حديقة وريحة الورد والفل والياسمين بتشمها من ع بعد كيلو… قبل كم يوم قال واحد من أصحابي كان عندي في الثمانينات فيلا مرتبة في عمان تركناها لما رحت اشتغل في الخليج، ولما رجعت بعد عشرين سنة ما عرفت اسكن فيها شهر واحد، الاسكانات حاصرتنا من جميع الجهات وكشفتنا، لا بنقدر نقعد في الحديقة ولا بنقدر نتحرك، حتى الاباجورات على الشبابيك ما بنقدر نفتحها،… وللاسف بعتها غصب وسكنت في شقة، أكثر شي حز في نفسي الحديقة وقعداتها وشغلي وتسلايتي فيها، زرعت فيها كل ما يخطر ع بالك خضار وأشجار مثمرة كذا نوع، ويمكن كل الحارة أكلوا منها…

موجة الحر هالايام ذكرتني يا جماعة كيف كنا احنا الشباب في بعض ليالي الصيف ننام على السطوح… البيوت مستقلة ومستورة وما حد بشوف حد… وكل واحد ماخذ راحته في بيته عالاخر وأغلب الناس كانوا يناموا في الصيف يا في الحوش يا اما عالسطوح… أحلى نومه نومة السطوح، بعض الكبار اذا ناموا عالسطوح كانوا يحطوا فوقهم ناموسية عن القارص والبعوض، اما احنا كنا نحب نتمدد على ظهورنا ونتفرج على السما… يا سلااام عالمنظر… خصوصا اذا الليلة من أواخر ليالي الشهر العربي يعني ما فيها قمر، بتشوف منظر النحوم منظر بديع مستحيل تنساه… بتشوف كل النجوم كأنك في قبة فلكيه… منظر بخليك تتأمل وتقول من قلبك سبحان الخالق فيما خلق، بتشوف الأبراج إذا بتعرف الابراج، برج الميزان وبرج الثريا وبرج العقرب… وغيرها… هدوء ونسمات وجمال رباني وروعة وهداة بال… اقولك حتى اللي ما سمع في الشعر أو ما بحب الشعر بقلب مع هالنومه رومنسي ويمكن يصير شاعر…

قراءة المنشور الأصلي على فيسبوك