مدونة عبد الله كريشانبحث

لكل زمان ديوان

عبد الله حامد كريشان
رسم تعبيري لخاطرة «لكل زمان ديوان»

الديوان زمان كان يجتمع فيه الأهل والقرايب والخلان والجيران والحبايب… بيت شيخ العشيرة كان ديوان، بيت قاضي العشاير ديوان، بيت كبير العيلة ديوان… وكل بيت كان فيه غرفه كبيرة اسمها ديوان، غرفة للضيوف مفتوحة… وكل الدواوين كانت للقريب وللغريب مفتوحه، دق الباب وادخل ويا هلا ويا مرحبا بالحبيب… مافي بروتوكولات، ما في استئذان ما في مواعيد . لمات وقعدات وسهرات وتعاليل بتفرح القلب وبترد الروح وبتشفي العليل. المصطبى على باب بيت الطين أو قدام الدكان كمان كانت ديوان وأي ديوان… لكن من لما هلت علينا الحضاره انقلب كيان الحاره، وتغيرت الموازين وخربت كل هذيك الدواوين… تحولت بيوت الطين شوي شوي لبيوت اسمنت وقرميد، كان كل ولد من العيله أيام بيت الطين إذا تزوح بنى في الحوش غرفتين وقعد… كل الاخوان كانوا لبعضهم عزوه وسند… مهما كان عدد الأولاد عديد بيت الطين بكفيهم وبزيد، ولا تنسى الخرابه ورا البيت، ظلموها لما سموها خرابه،. فيها البير والمي العذبه الزلال وفيها ملاعب العيال… فيها خبز القمح والطابون وفيها خبز الصاج وفيها غنم وحلال وأرانب ودجاج، حليب وبيض وزبدة وجبن وسمن وفيها بتنذبح للضيوف الذبايح ويا محلى ريحة الحطب لما دخانه يكون طالع وفايح . يوم شرفت الحضارة لعبت كمان في عقول الصبايا… قالت العروس ما بسكن مع العيلة وما بدي بيت طين وخرابه بدي بيت لحالي جديد وبدي اياه اسمنت وحديد وعن العيله يكون بعيد بعيد… سكنت العروس لكن بيت الاسمنت ما كان بيت سعيد، لانه عن الارحام وعن الحياه وعن البر كان بعيد. ومرت السنين وظلت الحضارة تلعب وتغير في القيم والموازين، حتى بيت الأسمنت اللي كان فيه حوش وشمس وورد وسكانه مع الجيران ومع بعضهم متواصلين والجميع بالعادات الطيبة متمسكين، انقلب البيت لشقه ضيقه مثل الصندوق لا شمس ولا حديقة ولا ضيوف ولا قعدات ولمات مثل هذيك اللمات العتيقه، الشقه في عماره والعماره جنبها عماره، عمارات حجر ورخام لكن مثل ما قالوا من برا رخام ومن جوا سخام… ما فيها روح من روح الحاره، لا جار بعرف جاره ولا الجاره بتحن عالجاره… عمارات مالها من اسمها نصيب… ويا ريت وقفت امورنا عند هالحد… بالعكس، زادت الطين بله والأمور تجاوزت الحد… جتنا الإنترنت والهواتف الذكية صح مطلوبه وبتفيد لكن خلت اهل البيت عن بعضهم اغراب وغربتهم يوم عن يوم بتزيد… كل واحد عايش مع تلفونه، من طلعتها لغيبتها (مطبس) وبقضي معاه طول يومه… وهيك صار ديوان هالزمان ديوان فيس بوك وتويتر وواتس و انستغرام… والله يجيرنا يا اخوان من قادم الأيام…

قراءة المنشور الأصلي على فيسبوك