مدونة عبد الله كريشانبحث

تحت المنام

عبد الله حامد كريشان
رسم تعبيري لخاطرة «تحت المنام»

— حجي مرحبا، أمانة الله وين كنتوا تخبوا الأسلحة لما تجيكم كبسات التفتيش؟

— في المنام أو في الخرابه

— مصاري الحشمه والعيدية اللي بتصحلك وين بتخبيهم؟

— في المنام

— طيب وين محطوط الصندوق الزغير تبع العصمليات وقلاده الذهب والمباريم؟

— تحت المنام

— وفروة الحج والبساط الشتوي والخدرة وين كنتي تحطيها لما الدنيا تصيف؟

— في المنام

— طيب صابون اللوكس المعطر لويش بتشتري منه بالدزينه؟

— بحطو مع باكيتات عود الند بين الفرشات واللحفي في المنام وفي الخزاين والدروج مشان كل شي يظل معطر…

يا اخوان قد ما اسولف عن المنام الحوار ما بخلص، المنام في بيوت زمان ركن الأركان،

من لما يخطب العريس أم العريس بتبلش تفكر في المنام، منين تشتري الصوف، من أي قرية، ومتى ووين ومع مين بدها تغسله، غسيل صوف العريس لحاله قصة، محتاج عونه وفزعة نسوان… بعد ما يغسلنه وينشفنه بجي دور المنجد حتى ينجد الفرشات واللحفي واللحاشيات والمخدات، كل عريس لازم يدخل معه أقل شي ثلاث أربع فرشات صوف وأربع خمس لحفي غير المخدات اللي بتعرفوهن البيض الطوال المطرزات بالازرق… وقبل العرس بأسبوع في طقوس ومراسم وغناوي وزغاريت ويمكن طخ مع نقل منام العريس لبيت العريس

غلطت مره وقلت للوالدة صدقيني المنام اللي بتغلبن حالكن فيه ماله لزوم بظل مصفط عالفاضي. ما خلتني أكمل، كشرت في وجهي قالت كيف ماله لزوم؟ يعني فرشات الاسفنج تبعتكوا أحسن؟! فرشات الصوف بياض وجه، قد ما يجيك ضيوف ما بتحتار فيهم، ولما بجيك ضيف بتفرشلو منام زي العالم والناس، بعدين الصوف بظل إلك وللعمر… سكتت.

اللي بفكر يلاقي لقيه محترمه في بيوت زمان لا يدور غير في المنام بين اللحفي والفرشات وفي وسط المخدات.

واحنا زغار إذا عرفنا ان في تعزيل للمنام بنركض ركاض حتى احنا اللي نهد المنام، لازم نلاقي مصاري مدحوشات بين الفرشات وناسينها…

مواليد الخمسينات أو الستينات ياما لفينا سوق معان ندور على قماش ملاحف أو على خيط ملاحف وكشتبان، كل سنه لازم تتغير الملاحف…

المنام وفناجين القهوه والكاسات المرتبات فوق بعض في البوفيهات مين يقنع حجياتنا انهن يتخلن عنهن…؟ مستحيل

قراءة المنشور الأصلي على فيسبوك