مدونة عبد الله كريشانبحث

بعوض اليوم

عبد الله حامد كريشان
رسم تعبيري لخاطرة «بعوض اليوم»

يا اخوان حتى بعوض زمان كان غير، كان يستحي ويخجل، ما بتتذكروا الشاعر لما قال

وزائرتي كأن بها حياء

فليس تزور إلا في الظلام

اذا بتضوي ضوك بستحي وبروح

بعدين لما يجي بشعرك إنه جاي، بظل يزن ويطن عند راسك وعند إذنك قبل ما يقرصك كأنه بنبهك وبستئذن، بعوض اليوم لااا اليوم كل شي يا حبيبي غدر وكل شي عالساكت، واليوم حاشاكم ما ظل في لا حيا ولا خجل. مو بس هيك، بعوض زمان ما كان يقرص كل اللي في البيت، كان يختار وينقي الدم اللي بعجبه، اليوم لا، القرص والاذية للجميع وعنجنب وطرف، قرصة زمان بتحكها شوي وبعد ربع ساعة بتنساها وكأن ما صار شي، اليوم تعال وتفرج على قرص اليوم، دمار شامل، زي ما انتو شايفين بالصور، حتى البعوض انقلب اليوم متوحش وخطير،، وطلعتلنا حشرة جديده ما بنعرف هي من البعوض ولا هي من ايش، بوزها زي المنشار ومنقطة تقول نمر، وبتتسلبد تسلبد، قرصتها عافاكم الله قرصة غل وكره وحقد يا لطيف، وما عندها مشكله في كل الأوقات بتقرص، في الليل بتقرص، في النهار بتقرص، وانت قاعد بتقرصك، وانت ماشي بتقرصك، مفجوعه، ما بتشوفها ولا بتحس فيها، لكن بتحس تقول دبابيس اشتغلت تغزك من جوا جوا من محل القرصة، بعد شوي بصير معك حكة شديدة وألم، بعد شوي بتنتفخ، وبعدها بتتورم، وزي ما قالوا اخوانا في مصر إذا انقرصت من هالبعوض عينك ما تشوف إلا النور، لا بنفع مع قرصته ثوم ولا سبيرتو ولا حبوب حساسية ولا براهم ولا زيوت ولا دهون ولا حتى كورتوزون… إذا انقرصت، ثلاث أربع أيام بتعاف حالك، حتى نوم ما بتعرف تنام من الحكة والوخز والألم، وإذا لا قدر الله انقرصت في وجهك معالم وجهك كلها بتروح يمكن أهل بيتك ما يعرفوك…

مبارح أنا انقرصت ورحت لصديق صيدلي قلتله الحقني يا دكتور، ما خليت دهون ولا دوا ولا براهم لكن بدون فايدة وزي ما انت شايف، قال للاسف ما إلك غير انك تتحمل… قلت شو؟ قال تتحمل… صفنت شوي بعدين قلت ااااه… صحيح لازم اني اتحمل… بعدين ليش ما اتحمل؟!، ما أنا متحمل كل شي، إذا أنا متحمل بلاوي الدنيا كلها ما اتحمل قرصة بعوضة؟! اذا أنا متحمل عوج حكومتنا كله اللي بهدلتني وبهدلت عيلتي آخر بهدلة وشتت عيالي كل واحد راح يدور رزقته في بلد، ما بدي أتحمل قرصة بعوضة؟! إذا أنا وغيري متحملين خيبة امل أولادنا وبناتنا واللي صار معهم بعد ما دفعنا على دراستهم دم قلوبنا وتخرجوا وبعدها قعدوا في وجوهنا في البيت سنين عاطلين باطلين لا شغلة ولا مشغلة، ما بدنا نتحمل قرصة بعوضة؟! اذا متحملين ظلم القوانين اللي ضيعت حقوقنا وشجعت النصابين ينصبوا علينا واحنا بنتفرج ما بدنا نتحمل قرصة بعوضة؟! إذا متحملين نكد هالعيشة وسط ناس ما واحد فيهم طايق الثاني ما بدنا نتحمل قرصة بعوضة؟!

ومتحملين كل هالهم والغم والغلا والكوى ولعانة الثوى ما بدنا نتحمل قرصة بعوضة؟!! لا يا سيدي ماشي وبنتحمل… لكن في قلبي كلمتين لازم اقولهم…

يا…

يا بعوض بكفي لحد هيك استحي واخجل على حالك

قراءة المنشور الأصلي على فيسبوك