شعور

كيف شعورك إذا صار معك مثل ما صار معي اليوم؟ عندي عزومه والحجي مسافره عند ابنها، طلبت أكل من مطعم من مطاعم عمان والضيوف وصلوا كلهم وقاعدين عندي في البيت والكل فرحان في هالاخبار، أخبار علقم اللي مثل العسل… صار موعد الاكل لكن الاكل ما وصل والمطعم ما اتصل، حاولت الف مره ارن على المطعم لكن بدون فايده، ما عندي ناس من اولادي ولا عندي ناس اكلفه يروح يشوف شو القصة وليش التاخير، استأذنت من الضيوف، من اللخمة ما لقيت مفتاح السياره، مر خمس دقايق لغاية ما لقيت الاحتياط، ضغط الدم عندي كل ماله برتفع، تحركت باتجاه المطعم، المطعم بعيد، والسير كالعاده واقف، معروفه زحمات شوارع عمان، ولأنها اليوم متطينه عالاخر صار كمان قدامنا حادث وسكرت عالمزبرط، بطلوع الروح وصلت المطعم، عند المطعم ما لقيت موقف للسيارة، وقفت السيارة في نص الشارع ونزلت ركض وبعد حوار وزعيق وهوشه طويله عريضه لمت علينا الناس طلع الدلفري مخربط ومرجع الاكل، المهم اعطوني الاكل، وانا راجع باتجاه سيارتي لقاني ختيار طاعن في السن قال داخل عليك تقرالي هالورقة شو مكتوب فيها أنا رجل تايه ومعاي هالعنوان وما بعرف اقرا ولا أكتب، قلت يا حبيبي على هالتوقيت، حطيت الأكل على الأرض وأخذت الورقة لقيتها مثل كتابة الدكاتره خرابيش جاج، ما عرفت اقرأ منها ولا كلمة طلبت من واحد مار جنبي قلتله مشان الله ساعد الختيار خليني أروح مستعجل واعتذرت وحملت الأكل باتجاه السيارة، ضغط الدم التحتاني صار أعلى من دخل نص الشعب الشهري، لما وصلت مكان السياره ما لقيتها، الشرطة الله يسلمهم ساحبينها للحجز لأني مسكر الشارع، حلو تطبيق القانون، بس مو على قدي وفي هاليوم بالذات، لا إله إلا الله، ربنا يجيبك يا طولة الروح، وقفت تكسي مع انه قرنبع ماكل هوا بس حتى الحق الضيوف، يا سواد الوجه الحين شو بقولوا عني،، ركبت التكسي، ما مشى شوي الا وطلع معه صوت في الماتور، وقف على جنب قال الاكس فقع، قلت أكيد لازم يفقع وكمان في واحد ثاني على وشك يفقع، قال وهو ماسك راسه بعينك الله شوفلك تكسي ثاني… أعوذ بالله من العفاريت السود واعوذ بالله من فعايل ال ي ه و د…، يا عمي المنحوس منحوس شو بدك في الحكي، وانا واقف بستنى تكسي ثاني حسيت ان الجلطه قربت، ما ظل فيي لا حيل ولا أعصاب ولا رجلين يحملوني، حطيت الأكل على الأرض وقعدت على الرصيف مثل شحادين السيدة زينب، وفجأة أجاني صوت في اذني وايد زغيره بتسحبني جدو جدو مالك يا جدو نايم وانت قاعد قوم تعشى جدتي حطت الأكل .