بني عجل

— السلام عليكم
— وعليكم السلام
— قو الرجال
— قواكم الله
— هنهم
— منهم… افلحوا
— يالله الفلاح… شو طابخين
— زي منتو شايفين… كبسه… بسم الله
— تعال يابوك ذوق طبخ السواقين، في هالمكان قبل طلوع النقب اغلب سواقين الشاحنات اللي جايه من العقبة بوقفوا على جنب الطريق يرتاحوا، طلوع النقب قوي ومتعرج وخطير وبوخذ وقت كثير معهم، كمان بريحوا الشاحنات لأنها بتكون محمله بخافوا تقصر معهم في الطلوع، اذا كان الوقت وقت غدا كل ثلاث اربع شاحنات بوقفوا مع بعض وبتشاركوا في الأكل زي منت شايف، واحد سيارته هنشل والثاني افطس موديل ١٩٨١ يعني موديل سنته، وهذيك ام غليون، وإذا بدك تعرف اسماء كل الشاحنات هذيك الماشيه عالخط اول وحده مان واللي وراها راس وجرارة واخر وحده مرسيدس راسين… كلهن محملات للعراق، من لما بدت حرب العراق وايران سكرت مواني العراق وصارت بضايع العراق كلها بتيجي من مينا العقبه… الله ينصر العراق.
— الحمد لله، يخلف عليكوا اما كبسه من الاخر. شايف يابوك كيف قعدات عمامك السواقين كلها ضحك وانقله ما بتنمل هذول اسمهم بني عجل
… يله اسمحولنا، سلام.
— لا استنوا اشربوا شاي كاسة شاي النار غير شكل وبعد الشاي كلوا بطيخ معنا بطيخة زي العسل شقحناها وحطيناها ع بوز السيارة تبرد
— بصراحة أنا كمان كنت ناوي أوقف اطبخ بس ما كنت ناوي اطبخ كبسه كنت ناوي على صاجية لحمه وبندوره
— يا سلام اكله معتبره لا تقولي مطاعم ولا غيره، واحنا لما يكون البال رايق بنسوي قرص نار (عربود) ابصر ابنك بعرف شو العربود
— كيف ما بعرفه ياما سلخ مجلله لما السمن البلدي نقط من كوعه… شو رايك يابوك؟
— اقولك شغله يابا وما تزعل مني؟ أنا بس أكبر بدي اصير سايق تريلا
— انبسطتوا هيك وعجبكوا؟ كبستكوا وقعدتكوا غيرت تفكير العيل وكل مخططات مستقبله.