نقرشي

شو بتسوي يا شين؟ ليش معفس الدروج هيك؟ ليش طول النهار بتنكش؟ بعدين معكوا؟ اخصو هلكتوني، أني برتب وانتو بتنكشوا… الله اكبر، كللتوني وطققتوني يا شيخ. بعدين هاظا درج اخوك مو درجك ليش بتنكش فيه؟ ما خلصت ترتيب البيرو والخزانه غير مبارح، كوم غسيل اللي غسلته مبارح وراكوا، انقطع ظهري من غسيلكوا ومن الكوي، وانتو ولا هامكوا بس بتوسخوا وبترموا، ابوكوا غيار واحد بغير في الأسبوع وانتو كل يوم غيار،. بعدين انت ع شو بتدور صارلك ساعة بدي اعرف؟ قولي شو بدك، ترى قروش عندك في دروح البيرو ما في لا تتعب حالك، البيرو تراه للهدوم بس. واذا كنت بتدور على باكيت السلفانه ولا على صفط الناشد كمان لا تتعب حالك مو هانا غيرت محلو، بعدين تعال مليح اني تذكرت، السلفانه يا افنديي مخلصينها ومخلين لي بس الباكيت، سعادين انتو منتو اوادم، ما بتخلو شي!! ولا بتغروا عن شي!! اول مبارح رحت متهوسي اقدم السلفانه للنسوان قبل ما يروحن لقيت البكيت محله فرحت، قلت اوه كيف صارت وسلم منكوا… لما فتحتو لقيته فاضي ومخزوق من ورا، واني زي الصحيح معتمدي اني مخبينه في الخزانه، يقطع شركوا القرود والسعادين مو هيك، ولا حبي مخلين فيه!! كل ما فتحت الخزانه بشوفه محله بقول مليح، اثريتكوا قاضين عليه بتسحبو حبي حبي من الخزق… اكيد ما ناس سواها غيرك انت، عيونك بتزارقن، قوم يله… قوم فز، روح عالمطبخ افتح النمليه ومد ايدك للرف الفوقاني تحت الجلالي البيضا، اه الشرشف اللي حاطيتو منظر تحت الصحون والكاسات، في تحتيه شلن يا بتلاقيه في فنجان القهوه، خذ الشلن وروح زي الطير جيب من دكانة عبدالحميد وقية نقرشي نقرشتو مليحي مو مثل باقي الدكاكين نقرشتهم محنحني، وشوف اذا عنده نكاشات بابور جيب نكاشي، بابورنا راسه مخنق شكله بدو نفض، اسمع، لا تطول بشده بالك، الجارات ادهن يجن العصر عندي وما عندي شي أقدمه الهن. و رجّع باقي الشلن، فاهم، ومو تغطس وتقعد تلعب قلول مع العيال في الحاره، عارفيتك، انت حر… ترى الحفاية بتستناك.
يمه اسمها تسالي، بزر، مخلوطة… مو نقرشي… بعدين ليش ما تسويلهن قالب كيك من قوالبكي الحلوه اللي بتحطي فيه جوز، خلينا نستفيد من جيتهن، أنا بعبيلكي رمل للقالب وبزبط الكي البابور غير شكل.