عيديات

قالت يا جدو خذ عيديتي عدها، اخذت وعديت، ما شاء الله عشره، عشرين أربعين، تسعين ميه… ميه ودينار… كل سنة وانت طيبة يا جدو… وين امك عنك وعن هالعيدية،، الله يرحم ايام ما كانت الامهات توخذ عيديات أولادهن… توخذ مين يا جدو والناس نايمين؟! كم كانت عيديتك يا جدو وانت قدي؟ ضحكت… ليش بتضحك؟ ابدا يا جدو بس تذكرت القرش والتعريفة والبيضة والقضاما المالحه والقضاما الفيصلية… وملبس الشوب وبيض الحمام والملبن… بس حاس يا جدو أنا كنا مبسوطين أكثر منكوا ولو ان عيدياتكوا أكثر من عيدياتنا…
الحلو في العيد زمان يا اخوان انك بتحس ان العيد جاي على الاقل من قبل أسبوعين، في هيبه وبهجه لعيد زمان… البيوت بتتقلب فوق تحت، تعزيل وتنظيف لو يهم للنسوان يخلعن البلاط وينظفن من تحته، وكت و (تنفيض) سجاد في الشارع حتى سقف البيت بتعسف وبتنظف لا مش بس هيك حتي الشارع كله بتكنس وبرتش، الاثاث ما بتظل قطعة في مكانها كله بتغير ترتيب جديد احتراما للي جاين في العيد. وبقرب العيد أكثر وبتهل عليك وحواليك وبتفوح روايح الكعك والمعمول، وبقرب العيد أكثر وبجي دور الهدوم وملابس العيد، وكل واحد متا بحط غياره عند راسه ليلة العيد… ومن صباح الله خير بنطلع نلف على بيوت الحاره، كلهم قرايب وحبايب، كانت الجدات والخالات والعمات يوم العيد يستقبلونا زي ما نكون كبار وشيوخ… يبوسن ادينا، يصبولنا القهوه الساده… ولما نيجي طالعين، افتح يابنيي مكتومتك وتكمش الجده من الملبس المشكل وفي وسط الكمشه كم قرش وتحطهم في مكتومتك (جيبتك) عيدكم مبارك يا عويلي .
فطور العيد بكون عند الجد أو عند كبير العيله رز حامض أو مجلله… احنا الزغار ما كنا نقعد للفطور، طبعا بنكون في الشارع عند المراجيح وعند عجقة وبهجة العيد أو عند الدكان بنشتري سحبه البالونات أو بنستاجر بسكليتات…
زمان ما كان في قروش كثير لكن في راحة بال وروقان كثير…