مدونة عبد الله كريشانبحث

مع نزلة الراتب… وعلى باب المؤسسة…

عبد الله حامد كريشان
رسم تعبيري لخاطرة «مع نزلة الراتب… وعلى باب المؤسسة…»

قبل ما تمسك مرته العرباية مسكها من ايدها… تعالي انت والاولاد بدي اياكو… وعلى جنب وقف وجمعهم حواليه… دار ظهره… مد ايده في جيبته… مش مبين شو طلع منها… لكن اكيد طلع المحفظة… رجعها… لف وحهه عليهم… لكن وجهه هالمره متغير… كل تصرفاته اليوم مش طبيعية… عمره ما كان هيك… كلمهم مع كشره قوية… اسمعوا يا اولاد… وانت كمان يابنت الحلال ركزي معي… بقولوا المنظفات مؤذية وبتأثر كثير على صحة الاولاد وبتسبب حساسية واكزيما للبنات وللنسوان مشان هيك قررت نخفض مشتريات المنظفات للنص. ومشان فلونزا الخنازير والبقر والطيور… بدنا نحتاط… من اليوم ورايح لازم نخفف من اللحم والجاج عالآخر… والقرار الشهر هاظا مافي داعي توكلوا لحمة ولا حتى جاج… مالها مفركة البطاطا… وقلايات البندورة؟! الرشوف كمان هالايام زاكي وبدفي… وشوربة العدس مع الفجل بروتين عالحل… ترى في طبخات كثير ما بدها لا جاج ولا لحمه… يعني ما رح نشتري لا جاج ولا لحمة… حتى الاجبان بقولوا مهي كويسه… وانتو يا اولاد… اسمعوني كويس… مبارح اجاني فيديو عالواتس بقول لازم الاولاد هالايام ما يقربوا على الشوكلاطة والسكريات بالمره… بقولوا عنها مش كويسة… وانا بصراحة اقتنعت بكلامهم… والقرار طبعا لا تجيبولي الحين سيرة الشوكلاطة واحنا جوا…

- استغفر الله العظيم… مالك يا زلمي صلبتنا ع باب المؤسسة كل الناس بتفرجوا علينا… والله ما تقول غير مسويلنا مؤتمر صحفي… يلله خلينا نشتري اغراضنا ونروح…

- استني لسا ما خلصت… المحارم… اللي بتجيبولي اياها كل مره اشكال والوان… اشي باكيتات واشي رولات كبيرة واشي رولات زغيره… كله هذا بدكوا تنسوه نهائي… والقرار… المنشفه اللي بتخرب في البيت… بتقصقصيها مربعات وبتوزيعها عليهم وكل ما بتتوسخ بتغسليها… هيك احنا كنا زمان… كل واحد خرقته في جيبته…

- خلصت يا زلمه ولا بعدك؟

- لأ… ظل كم قرار…

- لا اله الا الله… وبعدين معك يا زلمه نازل فينا قرارات… ما بكفينا قرارات… اللي ما بتسمى…

قراءة المنشور الأصلي على فيسبوك