مدونة عبد الله كريشانبحث

استغلال

عبد الله حامد كريشان
رسم تعبيري لخاطرة «استغلال»

اشترى باكتين دخان وقداحة… قال للتاجر سجلهم… كم يوم ان شاء الله ربنا بفرجها وبسدك اياهم وبسكر حسابي كله… عند طرف الواد في مصطبة… لما بتضيق عليه بروح يقعد هناك قعد… وولع سيكاره… وبلش ينفخ… ايش ينفخ لما ينفخ… ينفخ الدين اللي تراكم عليه.ولا ينفخ ابجار البيت المكسور من ست اشهر… ولا ينفخ الغلا والكوى اللي كل يوم بزيد… ولا ينفح البطالة اللي مهي حاله عنه… اسبوع بشتغل وعشرة لأ… ولع الثانية… ورجع ينفخ… الاولاد بدهم هدوم… والمدارس بتفتح بعد كم يوم… والمصاريف بتزيد… المره بتقول البيت خاوي ما فيه اللي يبل الريق… حتى خبز ما فيه… الله يفرجها من عنده… حس ايد واحد على كتفه… لف وجهه… شافه… اعوذ بالله هو انت؟ منين بتطلعلي يا رجل؟! انت بتراقبني وبتلاحقني ولا شو قصتك؟! أنا عارف شو بدك… بدك تستغل وضعي وتستغل حاجتي… لكن بعيده عن شواربك… ومن الله ولا منك… اسمع… لا تتعب حالك ولا تحاول… الله بيني وبينك… والله الغني عنك وعن مصاريك… لازم تفهم يا رجل اني مستحيل ارد عليك ومستحيل اطاوعك… وخليني اجيبلك اياها من الآخر… شايف… لو حتى اولادي بموتوا من الجوع واحد ورا الثاني… وانا بشحد الخبز ع باب الجامع… ما بشتغل شغلتك… روح وحل عني انت وكل مصاريك وكل الافك الوسخة الحرام اللي بتغريني فيها… اقولك والله لو بتعرض علي ملايين مش الاف ما اشتغلت معك… ما ظل علي غير الدمار والعار… ما ظل علي غير المخدرات… اعوذ بالله من غضب الله…

قراءة المنشور الأصلي على فيسبوك